Бүгүн Чоң-Алай райондук мамлекеттик администрациясынын жыйындар залында координациялык комиссиянын жыйыны болуп өттү. Жыйынды Чоң-Алай райондук мамлекеттик администрациясынын башчысы-акимдин орун басары, координациялык комиссиянын төрагасы Б.Бакыбеков алып барды. Жыйынга райондук прокурор А.Сыдыков, Улуттук коопсуздук мамлекеттик комитетинин Ош шаары жана Ош облусу боюнча башкармалыгынын Чоң-Алай райондук бөлүмүнүн өкүлү А.Таштанов, райондук ички иштер бөлүмүнүн башчысы З.Сарыков жана тиешелүү мекеме ишканалардын жетекчилери катышты.
Жыйындын жүрүшүндө төмөнкү негизги маселелер каралды:
2025-жыл ичинде райондун аймагында катталган үй-бүлөлүк зомбулук учурлары жана Кыргыз Республикасынын «Үй-бүлөлүк зомбулуктан сактоо жана коргоо жөнүндө» 2017-жылдын 27-апрелиндеги №63 Мыйзамынын талаптарынын аткарылышы боюнча маалымат угулду. Бул багытта алдын алуу иштерин күчөтүү, жабырлануучуларга көрсөтүлүүчү социалдык жана укуктук жардамды жакшыртуу боюнча сунуштар берилди.
Кыргыз Республикасынын Укук бузуулар кодексинин талаптарынын аткарылышы жана райондун аймагындагы укук бузуулардын жалпы абалы талданды. Укук коргоо органдары тарабынан жүргүзүлүп жаткан профилактикалык иш-чаралар, аныкталган кемчиликтер жана аларды жоюу жолдору талкууланды.
Терроризмге жана экстремизмге каршы 2025-жылы жүргүзүлгөн иштер жана бул багыттагы көйгөйлөр боюнча маселелер каралды. Коомчулук менен иш алып баруу, түшүндүрүү иштерин күчөтүү жана коопсуздук чараларын мындан ары да бекемдөө зарылдыгы белгиленди.
Күн тартибиндеги 1-2-маселелер боюнча Чоң-Алай райондук ички иштер бөлүмүнүн башчысынын орун басары С.Темиров, 3-маселе боюнча Чоң-Алай райондук ички иштер бөлүмүнүн улук ыкчам өкүлү И.Көчкөнов баяндама жасады
Жыйындын жыйынтыгында тиешелүү мекемелерге конкреттүү тапшырмалар берилип, укук бузуулардын алдын алуу боюнча өз ара кызматташууну күчөтүү чечими кабыл алынды.
––––––––––––––––––––·––––––––––
Чоң-Алай райондук мамлекеттик администрациясы
